लागी भीजी

ठीट चहाँ जंगल जैरछी

धुरका-धुरूक भाजणों छी

एक आछो पाछिल बटी काव मुनेई

मैं बिलबिलान है गोछी ।

कस छि, के छि उ, काव मुनेई

अन्ताज जस नि आयी

के हुनल, आजी तले समझ में नि आई

डरे मारी आंग, लग-लगे गोय। 

ब्याव हूँ ख्वर भारी हैगोय

हाथ, खुट कम्मर टूटी जस ग्याय

घर वाल ले परेशान है गेछि

उनुल अंतज लगे हैछी

के न के लाग गो इपर आज ।

कैले रै मंतर, कैले झाड़-फूंक कर

कैले मार्चे धूं लगाय

सबले आपण-आपण जोर लगाय

लेकिन चार हाथ-खुट छोड़ी पड़िये रॉय।

रातक दस बाज गेछि

घरवलांक ले नींद हराम है गेछि

रातै दस बजी दौड़ी डांगरिये पास

डांगरी कणी हातों-हात बुले ली आयी ।

डांगरियल दुलेण लगाय

द्याप्त नाचण भैगाय

द्यातुं केँ एक थाई में खारुन देयी गोय

मगेंले द्याप्तों समणी बैठाइ गोय ।

द्याप्तों जजिया जय मामू शुरू हैगोय

म्यर पूठ में जोर जोरल हाथक बददैक मारी गोय

द्याप्तोंल कौय रे, पै स्वकार बाबु

इपर लागी भीजी छू रे य ।

घरवालुंल हाथ जोड़ी बेर

पूछ मांगी गोय द्याप्त हैं

हे ! द्याप्ता त्वी बता के लागी भीजी छू इपर

जे कौल से द्युल, म्यर नान ठीक हैंयी चें ।

द्याप्त जोर-जोरल नाची बेर कुणेछि

पाई स्वकार बाबू य जल भैरों छाया लागी रे

रोट-भेट, खिचड़ी दिण पडेल इगें

पजे तुमर नान य छाव हैजाल रे ।

पै स्वकार बाबु !

ऐल टिक बभुती लगे जानू

छ: महीने करार रखी जानू

छ: महेण बाद फिर पुजुल रे बाबु ।

म्यर मुनव में बभुती टिक लगायी गोय

चाऊँवक मोत्यों छणकी ग्याय

जान-जाने द्याप्त कै गेछी

पै रे स्वकार बाबु छाव हौ

राजी रौ, ख़ुशी रौ ।