न्यों मुख मंतरी

टिक पीठ्या लगावों रे
न्यों मुख मंत्री ल्ये रोईं
शकुनाख़र गाओ
माँगेय गीत गाओ
शंख घंटी बजाओ
ढोल दमूवे थाप लगाओ
बामाण बुले बेर हवन करो
धूप दीप पाठ पुज करो
जसी तसि जस भल काव हूँ
उस काव पहाड़े लिजी कर ध्यालो धें
न नतर पाँच साल टिकनी भले
या ढाई साल में भाजनी भले
हमर उत्तराखंड कुर्सी पै
क़िल्मौड़ू कान लागि भै
चस्स चस्स बुड़ने रूनी
मुख मंत्री खसिकने रूनी
सात मुख मंत्री हमूल जम करि हाली
आठु मुख मंत्री तुम छा
तुम आपण देई द्वार भलिके भेंट आया
खिचेडि दिणियाँ क़ें खिचेडि दी आया
ईज़ बाब क़ें चान चीताने राया
ख़ूब दिन दुनि दैण क़रिया
झिटी घड़ी समय मिलो तो
देई द्वार भेंटने रैजाया
जनम भूमि, करम भूमि क़र्ज़ तारला
तो पाँच साल आजि मुख मंत्री बडला।
भास्कर जोशी